|
Generela y Lia à enconté Plattner |
|
|
|
|
22-01-2010 |
|
Ai 18 de jené ti à na delegazion ladina fat na vijita al Sourastant dl Tirol Günter Platter. An volova tó endò su i contac storics anter la Ladinia y Desproch y porté dant n valgunes ghiranzes, che sarà tl davegnì de importanza fondamentala per i Ladins. La delegazion ladina fova metuda adum da na raprejentanza dla Union Generela (con a cef la presidenta Elsa Zardini) y da na raprejentanza dla Lia di Comuns Ladins (l’ombolt da La val, Dr. Franz Complojer) y é vegnuda touta su tl palaz provinzial dal Sourastant Platter y da la assessoura a la cultura Beate Palfrader (con parentela tla Ladinia, plu avisa a la Pli de Mareo).
Pian via dal gran resson che la partezipazion di Ladins a la gran desfileda storica dl 20 de setember 2009 à abù, ti él vegnù prejenté n curt al sourastant Platter y a la assessoura Palfrader la situazion atuala di Ladins dles Dolomites, dantaldut sia tripartizion y i problems che nasc da chesta situazion, souraldut la puecia y deguna sconanza che i Ladins à te Souramont. An à spo rejoné dl referendum di trei comuns de Fodom, Col y Anpezo y de sia volenté de ruvé endò pro l Südtirol, che mess tres ciamó vegnì traté tl parlament talian, sceben che entratant él passé passa doi agn.
Dret emportanta é la partezipazion de duc i Ladins – ence de chi de Souramont – a la Euregio Tirol. Zenza ruvará Souramont pro la Euregio “Alpen-Adria”, adum con l Venet, l Friul , la Slovenia y pertes dla Croazia. Te na tel Euregio jissa les carateristiches ladines-tiroleises di trei comuns endò sot.
A la fin ti él vegnù porté dant al sourastant Platter la proposta de deslarié i derc di Ladins dl Südtirol tl’Austria (azes a les universités, ai studentac, a scomenciadives de cultura y de formazion) ence ai ladins fora dl Südtirol.
Sibe l sourastant Platter che la assessoura Palfrader à empermetù de sostegnì les ghiranzes di Ladins y de se dé da fé per sia atuazion. |
Ascutede su la ciantia metuda adum da Alexander d'Al Plan en gaujion dl referendum dl 2007.
L referendum 2007 ti é vegnù dediché a Sisto Ghedina a cef de "Zent Ladina Dolomites" dal 1946 al 1948. 
