Amisc dla Ladinia Unida

Stimedes amies y stimés amisc, stimedes sostegnidoures y stimés sostegnidours dla Ladinia!

Ie volesse tò su chestes paroles fora de nost sit che m'à sapù emblematiches per chest moment storich:

"Nos on arjont la pruma piza, da olàche an pò bele vedei la Ladinia Unida!"

Do dut l laour che é vegnù fat él per me daspavent bel da vedei cie gran resultat che al é vegnù arjont. Te chesta ocajion volessi rengrazié duc mi colaboradours y duc chi che nes à daidé sun nost troi, y al en é sté dret trueps. La desponibelté de chesta jent (ladins, talians y todesc) é steda per nos n gran ejempl de solitarieté. Mia maiour ligreza é che la identité y la dignité dla jent ladina à endò ciafé forza y l respet da pert de nosc vejins é aumenté. Fodom, Col y Ampez l'à abuda ria do la despartizion voluda dai fascisc', nost sostegn ti à dé forza y segurté, la resposta é steda clera:

ei é y vuel resté ladins

Chest é n dert fondamental, prevedù ence da nosta costituzion. L resultat à sperdù trueps raprejentanc politics che ne pò sen nia plu se ascone o jì a chirí vertoles. L troi sarà ciamò lonch y sfadious, ma l prum vare, ie creie l plu emportant, é vegnù dé. Da sen inant saràl plu rie da nes mete bastons anter les rodes. Jent ladina, tegnon adum, anuzon chest moment storich, lascion demez egoism y oportunism, nost davegní é te nostes mans. I "Amisc dla Ladinia Unida" à desmostré cie che an pò arjonje sce an lieia idealism, sentiment y ligreza con l amour per nosta patria ladina.

Dilan, Marco Pizzinini, coordinadour dl Comité "Amisc dla Ladinia Unida - comité per la reunificazion dla Ladinia"